ትትንስእ እሞ ዓውታ ተህድእ፡ትለዓል እሞ ነውጺ ተርግእ፡ንሰይጣን ንስኻ ኢኻ እተፍርሆንሕሩይካ ብሰይፍኻ ትባልሆ፡ብምምጻእ ወድኻ ንትሑታት ዘከርካዮምክሳዕ ከተማ ህያዋን ከረን ጽዮን ኣብጻሕካዮም፡
ንዝሰለለ ቅልጽም ኢድ ተበርትዕበይንኻ ምጕት ዓለውቲ ትረትዕ፡ እግዚኣብሄር
- ንጸልማት ዝሰደዶ ብርሃን
- ንዅሉ ዓለም ዘብርሆ መብራህቲ፡
- ዘይነቓነቕ መሰረት
- ዘይፈርስ መንደቕ፡
- ዘይትስበር መርከብ
- ዘይስረቕ ማህደር፡
- ዘይነጽፍ ዔላ
- ዘይርብርብ ቅልጽም፡
- ሰናይ ኣርዑት
- ፈኲስ ጾር፡ እግዚኣብሄር
- ገጽ ግቡዛት እተዋርድ ክቡር
- ብዕቡያት ዘይትድፈር ሕፉር፡
- ምኽሪ ፈላጣት እተጥፍእ ምሁር
- ብሓይሊ ሰብ ዘይትግረም ምኵር፡
- ንመጺጽ እተጥፍእ ምቍር
- ሃሰስ ዘይትብል ከም ዕዉር፡
- ካብ ጥንቲ እተወርየልካ ንቡር
- የውጣ ዘይትጋገ ትኵር፡
- ማዕዳ ዘይትደሊ ምኹር
- ምሳና ዚዀንካ ሕቡር፡ እግዚኣብሄር
- መስመስታ በርቂ ክንደይ ዜሸብር እዩ?
- ዜሸብርሲ እቲ ንመባርቕ ዜርዕዶም እዩ፡
- ድምጺ ማዕበል ክንደይ ዜፍርህ እዩ?
- ዜፍርህሲ እቲ ንማዕበል ዜጠንቅቖ እዩ፡
- ስርዓት ከዋኽብቲ ክንደይ መንክር እዩ?
- መንክርሲ እቲ ንከዋኽብቲ ኣብ ህዋ ዜንጠልጠለ እዩ፡
- ምድማቕ ጸሓይ ክንደይ ብርቱዕ እዩ?
- ብርቱዕሲ እቲ ንጸሓይ ብርሃን ዝዓደላ እዩ፡
- መልክዕ ዕምባባታት ክንደይ ማራኺ እዩ?
- ማራኽሲ እቲ ኣቦ መልክዓት እዩ፡
- ግርማ መላእኽቲ ክንደይ ዜደስት እዩ?
- ዜደስትሲ እቲ ለኣኽ መላእኽቲ እዩ፡
- ብዝሒ ማያት ክንደይ ዘይውዳእ እዩ?
- ዘይውዳእሲ እቲ ንማያት ብሕፍኑ ዚሰፍሮም እዩ፡
- ዕዮ ኣካላት ሰብ ክንደይ ዕፁብ እዩ?
- ዕፁብሲ እቲ ኻብ ጭቃ ነዚ ዚገበረ እዩ፡
- ምንዋሕ እምባታት፡ ዕምቈት ቀላያት ክንደይ ዜስደምም እዩ?
- ዜስደምምሲ እቲ እምባታት ምስ ቀላያት ዜንቀጥቅጡሉ እዩ፡ እግዚኣብሄር
- ብረድኤትካ ዘክረና
- ብጕልድባኻ ኸውለና፡
- ብመጐስካ ሕሰበና
- ብምሕረትካ ኣናሕስየልና፡
- ብሰላምካ ተዛወረና
- ብክብርኻ ኣጽልለና፡
- ብስልጣንካ ዘምብየና
- ብዓቕልካ እለየና፡
- ብግርማኻ ልገበና
- ብፍቕርኻ ኣልዕለና፡
- ብኣእዳውካ ሕጸበና
- ብሓይልኻ ኣደልድለና፡
- ብመንፈስካ ኣለብመና
- ብወድኻ ኣንብረና፡ እግዚኣብሄር
- ትዕግስትኻ ንሓጥኣን ይጸውር
- ጽላልካ ንፍርሃት የባርር፡
- ጸዳልካ ንተረርቲ ይልውጥ
- ኵራኻ ንነገስታት የንቀጥቅጥ፡
- ትምህርትኻ ንደናቝር የልዕል
- እስትንፋስካ ንባሕሪ ይመቅል፡
- ኣሰርካ ንምድረበዳ የሳግር
- ግርማኻ ንእኩይኳ የስተንክር፡
- ዓቕልኻ ንኣና ይምዕድ
- ምምጻእካ ንሰይጣን የሰምብድ፡
- ፍልጠትካ ንስዉር የቃልዕ
- ብርሃንካ ንጸልማት ይዅልዕ፡
- ትሕትናኻ ንትዕቢት የናውጽ
- ኣእምሮኻ ንምስጢራት ይገልጽ፡
- እንግድዓኻ ንድኻታት ይስከም
- ጌጽካ ንዘኽታማት ይስልም፡
- ዘይትኻ ንቑሱላት ይዝንን
- ሓይልኻ ንእምባታት የድንን፡ እግዚኣብሄር
- ኣብ ምርኮ ዝፈጠነ መድሕን
- ኣብ ማእሰርቲ ዝበረቐ መስፍን፡
- ኣብ በረኻ እተረኽበ ቐላይ
- ኣብ ምድረበዳ ዝነትዔ ዓይኒ ማይ፡
- ኣብ እርጋን ዘብረየ ምርኩስ
- ኣብ ባርነት ዝረድኤ ንጉስ፡
- ኣብ ሓዘን ዘጸናንዔ ብጻይ
- ኣብ ውግእ ዝደገፈ ዘራይ፡
- ኣብ ስደት እተጋህደ ዑቕባ
- ኣብ ሽግር እተገልጸ እምባ፡
- ኣብ ከበባ ዝሓገዘ ሰይፊ
- ኣብ ድርቂ ዝሓረሰ ዕርፊ፡ እግዚኣብሄር
- ዘርሖኻዮ ኣይዕጾን
- ዝዓጾኻዮ ኣይክፈትን፡
- ዘስቴኻዮ ኣይጸምእን
- ዝመገብካዮ ኣይጠምን፡
- ዘዕቘብካዮ ኣይፈርህን
- ዝመራሕካዮ ኣይሽበርን፡
- ዘህዳእካዮ ኣይናወጽን
- ዝገሰጽካዮ ኣይጋገን፡
- ዘለበምካዮ ኣይዕሹን
- ዝጓሴኻዮ ኣይጠፍእን፡
- ዘብራህካዮ ኣይጽልምትን
- ዝሓሎኻዮ ኣይስከፍን፡ እግዚኣብሄር
- ፈጣር ኣዳም፡ ሓገዝ ህዝቅያስ
- ዓይኒ በርጢሜዎስ፡ ኣፍ ዘካርያስ
- ፈታው ኣብርሃም፡ ንብዓት ኤርምያስ
- መራሕ ዮሴፍ፡ ሓይሊ ኤልያስ፡
- በትሪ ሙሴ፡ ዘንጊ ኣሮን
- ስላዕ ሻምጋር፡ ዓንዲ ሲምሶን
- ወንጭፍ ዳዊት፡ ጥበብ ሰሎሞን
- መርከብ ኖህ፡ ሴፍ ጊዴዎን፡
- ጽንዓት እያሱ፡ ትንቢት ዲቦራ
- ትእምርቲ ኤልሳእ፡ ጽልጽለ ጺጶራ
- ትግሃት ነህምያ፡ ማሕጸን ሳራ
- እምነት ካሌብ፡ ተስፋ ማራ፡
- ትዕግስቲ እዮብ፡ ፍልጠት ዳንኤል
- በረኸት ይስሃቅ፡ ስልጣን ሳሙኤል
- መላስ ጴጥሮስ፡ ራእይ ህዝቅኤል
- ኣምላኽ ጳውሎስ፡ ኣቦ ኣማኑኤል፡ እግዚኣብሄር
- ዘይጠልም ቀስቲ
- ዘይውዳእ ርስቲ፡
- ዘይነቅጽ ሳዕሪ
- ዘይዓፍር ባሕሪ፡
- ዘይረስሕ ዛራ
- ዘይመጽጽ ማራ፡
- ዘይኣርግ ዓለባ
- ዘይድፈር እምባ፡
- ዘይደክም ሓይሊ
- ዘይነቅዝ እኽሊ፡
- ዘይትነቅዕ ናሕሲ
- ዘይትቕደድ ማእሲ፡
- ዘይትነጽፍ ቀላይ
- ዘይትዓርብ ጸሓይ፡
- ዘይትጐድም ሴፍ
- ዘይትዕበስ ኣፍ፡
- ዘይትዓውር ዓይኒ
- ዘይትጸምም እዝኒ፡
- ዘይትቓድር ግራት
- ዘይትስበር ዓራት፡ እግዚኣብሄር
- ከይለመንካ ትቕበል
- ከይተሓባእኻ ትኽወል፡
- ከይተዋጋእኻ ትማርኽ
- ከይረብረብካ ትባርኽ፡
- ከይተሓገዝካ ትመርሕ
- ከይተኸፈልካ ትሰርሕ፡
- ከይተነገርካ ትፈልጥ
- ከይተርኤኻ ትምስጥ፡
- ከይተሓበርካ ትኸይድ
- ከይተረታዕካ ትፈርድ፡
- ከይተሓለልካ ትመክር
- ከይተጸላእካ ትነብር፡ እግዚኣብሄር
- ከይጐየኻ ትቕድም
- ከይተጸቤኻ ትፍጽም
- ከይተኸፈልካ ትስልም፡
- ከይሓዀርካ ትድይብ
- ከይወዳእካ ትምግብ
- ከይበተንካ ትእክብ፡
- ከይተማጐትካ ትረትዕ
- ከይተጸነንካ ትሰምዕ
- ከይተነገርካ ትቐልዕ፡
- ከይሓምበስካ ትሰግር
- ከይዓቀንካ ትስድር
- ከይተቓለስካ ትስዕር፡ እግዚኣብሄር
- ኣዳራሽካ ሰፊሕ
- ደምቤኻ ሰፊሕ
- ጭማራኻ በሊሕ
- ዓመታትካ ነዊሕ
- ኣሰርካ መሪሕ፡
- ሻኻኻ ልሙዕ
- ምህሮኻ ስሩዕ
- ግልያኻ ጽኑዕ
- ግብርኻ ቕሉዕ
- ሓሽከርካ ንፉዕ፡
- ምህላውካ ጥዑም
- ትርኢትካ ግሩም
- ዚስዕበካ እሩም
- መቕደስካ ስሉም
- ሰራዊትካ ዕሉም፡ እግዚኣብሄር
- ሓሳብካ ጀማሪ
- ዝባንካ ጸዋሪ
- ክንፍኻ ሰዋሪ
- ዝኽርኻ ነባሪ
- ሓይልኻ ገባሪ፡
- ጸላኢኻ ሓሳዊ
- መንፈስካ ሓላዊ
- ወድኻ ጸጋዊ
- ተጻራሪኻ ዓላዊ
- ደፋሪኻ ጃጃዊ፡
- ለውሃትካ ናባዪ
- ባህርይካ ጓሳዪ
- ምሕረትካ ሓላዪ
- እምንነትካ ኣላዪ
- ወንጌልካ ፈራዪ፡ እግዚኣብሄር
- ካብ ጸልማት ብርሃን ዝገበርካ
- ካብ ሓመድ ሰብ ዝሰራሕካ
- ካብ ከውሒ ማይ ዘፈልፈልካ፡
- ካብ መኻን ሾብዓተ ደቂ ዘውጻእካ
- ካብ መቓብር ህያው ሰብ ዝጸዋዕካ
- ካብ ኣፍ ኣድጊ ቃላት ሰብ ዘስማዕካ፡
- ካብ ኣጋንእ ማይ ወይኒ ዘቕዳሕካ
- ካብ ጽላል ሰብ ፈውሲ ዝሃብካ
- ካብ ክንዲ ኢድ ደበና ሸምቦባ ዘውጻእካ፡ እግዚኣብሄር
- ፍቕርኻ ኣይጐደለንሞ
- ምሕረትካ ኣይነጸፈንሞ
- ሳህልኻ ኣይተወድኤንሞ፡
- ሓይልኻ ኣይደኸመንሞ
- ርህራሄኻ ኣይተለወጠንሞ
- በረኸትካ ኣይነቐጸንሞ፡
- ልብኻ ኣይጨከነንሞ
- መንፈስካ ኣይተሓለለንሞ
- ወድኻ ኣይሓመቐንሞ፡ ኣሎና ብህይወት፡ እግዚኣብሄር
- ኣብ ኣፍ ወታእ ቃል ተስፋ ዘስፈርካ
- ኣብ ጸጕሪ ናዝራዊ ሓይሊ ዘንበርካ፡
- ኣብ ሓንቲ በትሪ ፍርዲ ሃገር ዘቐመጥካ
- ኣብ መኣረምያ ሰብ ስልጣን ሰማይ ዘርኤኻ፡
- ኣብ ልሳን ገርሂ ሰብ ጥበብ ዘንጠብጠብካ
- ኣብ ልቢ ሓለቓ ተገውቲ ምሕረትካ ዘፍሰስካ፡
- ኣብ ኣእምሮ ሰጓግ ባሮትካ ወንጌልካ ዝሓተምካ
- ኣብ ማሕጸን ሓንቲ ድንግል ንወድኻ ዘሕደርካ፡ እግዚኣብሄር
- ኣብ ጸልማት ንእተሰወረ መን ይርእዮ?
- ንኽርዳድከ ኻብ ስርናይ መን ይፈልዮ?
- ንባርያ ወዲ ኣምላኽሲ መን ይሓርዮ?
- ንትሑት ግልያ ጐይታኸ መን ይኣልዮ?
- ልቢ ንዜትረረ ደፋር መን ይገንሖ?
- ኣእዳዉ ንዜልዓለ መስኪንከ መን ይመርሖ?
- ካብ ብርሃን ንእተኸወለ ሓሳዊ መን የፈድሖ?
- ነቲ መፈራርሂ ሰብ ድያብሎስከ መን የፍርሖ? እግዚኣብሄር
- ዓለም ንዜኽፍኣትሉ ስድራ እትኾኖ
- ፍርሃት ሞት ንዜሰምበዶ እትከናኸኖ፡
- ግፍዒ ንዚጸገበ ብተስፋ እተሕድሮ
- ሰብ ንዜርሓቖ ዓብዪ ጥበብ እትመኽሮ፡
- ዕረፍቲ ንዚሰኣነ ብለይቲ እትዛረቦ
- ብራዕዲ ንእተጨቈነ ብሰላምካ እትኸቦ፡
- ገጽ ሰብ ንዚኸበዶ ¬"ናባይ ጥራይ§" እትብሎ
- ኣብ በረኻ ንዚዀብለለ ብሳህሊ እተጽልሎ፡
- በይኑ ንዚመስሎ ጭፍራ ሓለውቲ እተርእዮ
- ጉባኤ ንዚፈንፈኖ ኣብ ምዅብላሉ እትኣልዮ፡
- ኣብ ዓይንኻ ንዚኸበረ ካብ ከይሲ እተናግፎ
- ስለ ስምካ ንዚሓሰረ ካብ ድጕዓ እተዕርፎ፡
- መስቀል ወድኻ ንዚጾረ ንወድኻ እተምስሎ
- ንእተኣመነካውን ናብ ክብሪ መንግስትኻ እትቕበሎ እግዚኣብሄር
- ሰብ እንተ ሓየለ፡ ስልጣንካዶ ኸይሰዓር?
- ሓጥእ እንተ ደፈረ፡ ስምካዶ ኸይሓስር?
- ዓማጺ እንተ በርትዔ፡ ግርማኻዶ ኸይድፈር?
- ሓሶት እንተ ዓምበበ፡ ሓቅኻዶ ኸይስወር?
- ጻድቕ እንተ ወደቐ፡ ምሕረትካዶ ኸይነጽፍ?
- ባርያኻ እንተ ተሓለለ፡ ምድጋፍካዶ ኸየዕርፍ?
- ምሕባእካ እንተ በዝሔ፡ ምግሃድካዶ ኸይተርፍ?
- ወጋሕታ እንተ ደንጐየ፡ ምግላጽካዶ ኸይሓልፍ? እግዚኣብሄር
- ከይንሕለል እሞ ኸይንጠልመካስ
- ከይንደክም እሞ ኸይንጠፍኣክስ፡
- ብምሕረት እተቓባበልካና
- ብፍቕሪ እተላሌኻና፡
- ኣብ ሰማያት እትነብር ኣቦና
- ኣብ ልብና እትሓድር መድሕንና፡
- ስለ ሰላምና እትነቅሕ ጓሳይና
- ስለ ዓወትና እትምጕት ዘራዪና፡
- ካብ ድነ ፍርሃት ዘምለቝካና መራሒና
- ካብ መንጋጋ ሞት ዘውጻእካና በጃና፡
- ቅልጽም ሰይጣን ዝሰዓርካልና ሓላዊና
- ምጕት ጸላኢና ዘዕረፍካልና ጠበቓና፡ እግዚኣብሄር።
- ኽንድ}ዚ እተፍቅረናስ እንታይ ስለ ዚዀንና?
- ማዕረ}ዚ እትሕልወናስ እንታይ ስለ ዘሎና?
- መላእኽትኻ ዚሕልዉናስ ክንደይ ድዩ ኽብረትና?
- መንፈስካ ዝሕብሕበናኸ ክንደይ ድዩ ዋጋና?
- ንስኻ ዝለገብካናስ ስለየናይ ጽድቅና?
- ወድኻ እተገርፈልናስ ስለየናይ ዓስብና?
- ቐደም ዝፈለጥካናስ ሓሲብናካ ዲና?
- ሽዓ ዝጸዋዕካናኸ ኣድሂናካ ዲና?
- ፍቕርኻ ዘይስፈር
- ምሕረትካ ዘይውዳእ፡
- ሰላማዊ ኣምላኽ
- ዓቃል መምህር፡
- ካብ ዘይውዳእ ዝመቅል
- ናብ ዘይነጽፍ ዝመርሕ፡
- ናይ ሰማይ መኰንን
- ናይ ምድሪ ንጉስ፡ እግዚኣብሄር።
- ሰላም፡ ኣበይ ቦታኺ?
- ፍቕሪኸ፡ ኣበዩ ማሕደርኪ?
- ምሕረት፡ ካበይ ትመጺ?
- ጥበብከ፡ ካብ መን ትወጺ?
- ርህራሄ፡ ኣበይ ክረኽበኪ?
- ኬርነትከ፡ ኣብ መን ክደልየኪ?
- ተስፋ፡ ምስ መንዩ ወገንኪ?
- ለውሃትከ፡ ኣብ መን ትውልድኺ?
- በረኸት፡ ምንጨይ ካብ መን ትብሊ?
- ህይወትከ፡ ምስጢረይ መንዩ ትብሊ? እግዚኣብሄር።
- ካብ ሓሙሽተ ጎጎ፡ መሶባት ኣየትረፍካንዶ?
- ብኽልተ ዓሳኸ፡ ሕልፊ ሓሙሽተ ሽሕ ኣይመገብካንዶ?
- ብሓንቲ በትሪ፡ መንግስቲ ኣየውደቕካንዶ?
- ብጫፍ ባርኖስከ፡ ርባ ኣይመቐልካንዶ?
- ካብ ሓንቲ መኻን፡ ህዝብታት ኣየውጻእካንዶ?
- ብኣፍ ሓደ ወታእከ፡ ኣርብዓ ዓመት ኣይተዛረብካንዶ?
- ኣእዛን ጽሙማን ኣብ ርሑቕ ቀስ ኢልካ ክትዛረብ ይሰምዓኻ፡
- ኣዒንቲ ዕዉራትውን ኣብ ቅድሚኤን ደው ኢልካ ይርእያኻ፡
- ልሳናውቲ ዓባሳት ዓው ኢለን ብዜማ ንምስጋናኻ የድህያ፡
- ኣእጋር ሓንካሳትውን ቕድሚ ዅሉ ጐየን ንዜናኻ የውርያ፡ እግዚኣብሄር።
- ኣብ ሓይልኻ ምድካም የልቦን፡
- ኣብ ምህሮኻ ምስሓት የልቦን፡
- ኣብ ምኽርኻ ምጕዳል የልቦን፡
- ኣብ ዑቕባኻ ምፍራህ የልቦን፡
- ብዘይ ማዕዳኻ ዝሰለጠ የልቦን፡
- ብዘይ ህላዌኻ ዝሰመረ የልቦን፡
- ብዘይ ደገፍካ ዝቐንዔ የልቦን፡
- ብዘይ ሓለዋኻ ዝሃድኤ የልቦን፡
- ቅድሜኻ ማንም ኣይነበረን
- ድሕሬኻውን ሓደ ኣይመጽእን፡
- መጠንካ ማንም ኣይዕቅኖን
- ደረትካውን ሓደ ኣይፈለጦን፡
- ዶባትካ ማንም ኣይበጽሖን
- ዕምቈትካውን ሓደ ኣይረኣዮን፡
- ንመንፈስካ ሓደ ኣይሰዓሮን፡
- ንወድኻውን ማንም ኣይሓየሎን፡ እግዚኣብሄር።
- ኣብርሃም እቲ ፈሳስ
- ኣልኣዛርውን እቲ ነዳይ፡ ኣብ ገነትካ ኣሕበርካዮም
- ዳንኤል ዘርኢ ንጉስ
- ኣሞጽውን ኣራይ ዳዕሮ፡ ናትካ ነብያት ገበርካዮም
- ኣሮን ዘረባ ኽእለቱ
- ሙሴውን ወታእ ኣፉ፡ ቃላት ስልጣን መላእካዮም
- ናይታ ድኻ ክልተ ሳንቲም
- ናይ ዘኬዎስ ፍርቂ ሃብቲ፡ ከም መስዋእቲ ርኤኻሎም
- ንጴጥሮስ ዘይተማህረ፡
- ንጳውሎስውን ስሙይ ምሁር፡ ሃዋርያነት ሰራዕካሎም
- ንዳዊት እቲ ንጉስ፡
- ገሓዚውን እቲ ሓሽከር፡ ምስ በደሉ ዘለፍካዮም እግዚኣብሄር።
- ባሕሪ ከም መንደቕ ደው ኢሉ፡
- ዕጨይቲ ጥሒሉ ሓጺን ኣጽባህሊሉ፡
- ዓሳ ሰብ ተፊኡ፡
- ካብ ከብዱ ነብዪ ወጺኡ፡
- ከውሒ ተሃሪማ ማይ ነቲዓ
- ኣድጊ ተዛሪባ ንጐይታኣ ረቲዓ፡
- ሓዊ ወሪዱ ንማይ ልሒሱ
- ብምንፋሕ መለኸት ቀጽሪ ፈሪሱ፡
- በትሪ ንባሕሪ ቐዲዳ
- ባርኖስውን ንርባ ጨዲዳ፡
- ኣምላኽ ሰብ ኰይኑ
- ረሲእ በዚ ድሒኑ፡ እግዚኣብሄር።
- ኣብ ሰማይ ብዘይካኻ ዘየልቦ
- ንኣኻ ምስ ረኸብና...
- ኣብ ምሕረትካ ኣጽሊልና
- ኣብ ልግስኻ ተመርኲስና፡
- ካብ ሪቕካ ተመቒልና
- ካብ ማሕደርካ ተዓዲልና፡
- ከይንሕለል ወድኻ ኣሎና
- ከይንድፈር መንፈስካ ምሳና፡
- ኣገልገልትኻ ደጊፎምና
- መላእኽትኻ ሓልዮምና፡
- ነቲ እኩይ ሰጒግካልና
- ንሰይጣን ኣርሒቕካልና፡
- ደቅኻ ንሕና
- ንስኻ ኣቦና፡
- እዚ ኹሉ ካብ ገበርካልና
- ኣብ ምድሪ ንደልዮ ነይብልና፡ እግዚኣብሄር።
- ክቡር መዝገብ
- ብሉጽ ኣኽሊል፡
- ዓሚቝ ጥበብ
- ሰናይ ምኽሪ፡
- ጽኑዕ ግምቢ
- ምቹእ ከውሊ፡
- ተስፋ ጻድቃን
- ሓጐስ ካህናት፡
- ምስጢር ህይወት
- ምንጪ እምነት፡
- ብኹሉ ጀማሪ
- ንኹሉ ፈጻሚ፡ እግዚኣብሄር።
- ድምጽኻ ነኽራናት ይጨድድ
- ንኣና ግን ብቐስታ ይምዕድ፡
- ንስኻ ኣብ ልዕሊ ኹሉ ትነብር
- ንኣና ግን ኣብ ማእከልና ትሰፍር፡
- ጸዳልካ ኪሩቤል የፍርሕ
- ንኣና ግን ብህድኣት ይመርሕ፡
- ነእዳውካ ብበርቂ ትስውረን
- ንኣና ግን ትስከመለን፡
- ነኽናፍካ ብሃልሃልታ ትኸበን
- ንኣና ግን ትስከመለን፡
- በትርኻ ነጋንንቲ ትገርፈላ
- ንኣና ግን ትጓስየላ፡
- ነድርኻ ንሰይጣን ተህድመሉ
- ንኣና ግን ተለብመሉ፡
- ስምካ ንመልእኽቲ ረዓዶም እዩ
- ንኣና ግን መጸውዒና}ዩ
- ወድኻ ንፍጥረታት ፈራዲኦም እዩ
- ንኣና ግን ጠበቓና}ዩ፡
- መንፈስካ ኣብ ኣርያም ፍሩህ}ዩ
- ንኣና ግን መጸናንዒና}ዩ፡ እግዚኣብሄር።
- ኣብ ግዝኣትካ ራዕድን ሓጐስን ኣሎ፡
- ኣብ ፍርድኻ ምሕረትን ግርፈትን ኣሎ፡
- ኣብ ኣርያምካ በረድን ሓውን ኣሎ፡
- ኣብ ህዝብኻ መስቀልን ኣኽሊልን ኣሎ
- ኣብ ባህርይካ ለውሃትን ቅጽዓትን ይርከብ፡
- ኣብ ደፍተርካ ምርን ምርቓን ይምዝገብ፡
- ኣብ መኣድኻ ባርያን መስፍንን ይቕመጡ፡
- ኣብ ዝኽርኻ ነዳይን ፈሳስን ይፍለጡ፡
- ኣብ ወድኻ ጥበብን ግርህናን ረኺብና
- ኣብ ነብያትካ መግናሕትን ተስፋን ኣሎና እግዚኣብሄር።
- _
እግዚኣብሄር.......!
Typography
- Font Size
- Default
- Reading Mode
